Háskóli Íslands

Nokkur sæti eru enn laus í Háskóla unga fólksins

Töfrar vísindanna í lifandi ljósi fyrir krakka á aldrinum 12 til 16 ára. 
Nokkur sæti eru enn laus í Háskóla unga fólksins sem verður dagana 13. til 16. júní. 
 
Hér eru nokkur góð ráð við skráningu
1.      Kynnið ykkur námskeiðin sem eru í boði. Hver og einn nemandi útbýr sína eigin stundatöflu og því er gott að kynna sér vel fyrirkomulagið og  námskeiðin sem í boði eru áður en skráning hefst. Við hvetjum ykkur til að hafa við höndina lista yfir óska námskeiðin, auk lista yfir námskeið til vara ef óska námskeiðin eru kennd á sama tíma eða ef einhver þeirra eru orðin fullbókuð. Tímatöfluna okkar má finna hér.
 
2.      Það er skemmtilegra að prófa eitthvað nýtt. Nemendur sem áður hafa verið í Háskóla unga fólksins ættu að prófa önnur námskeið í ár en valin voru síðast. Það er mun fróðlegra og skemmtilegra að upplifa eitthvað nýtt og spennandi heldur en að sitja sama námskeiðið tvö ár í röð.
 
3.      Það borgar sig að vera fljótur. Af tæknilegum ástæðum eru tímamörk á því hve lengi hægt er að staldra við inn á hverri síðu í skráningarkerfinu. Þess vegna borgar sig að vera búin að ákveða valið og vera snöggur að velja.  
 
4.      Skráning hefur ekki gengið í gegn fyrr en þátttakandi hefur fengið staðfestingu með tölvupósti á uppgefið netfang. Þegar skólinn byrjar að fyllst kemur upp textinn „Í augnablikinu er fullt í öll námskeið. Reyndu aftur.“  Þetta getur gerst í öllum skrefum skráningarinnar. Munið að skráning hefur ekki tekist fyrr en staðfesting hefur borist með tölvupósti. 
 
5.      Verið með upplýsingarnar tilbúnar. Á skráningarforminu er beðið um eftirfarandi upplýsingar. Netfang, kennitölu, heimilisfang og símanúmer nemanda og greiðanda. Símanúmer og netfang greiðanda og nemanda má vera það sama, t.d. ef börnin eru ekki með slíkt. Einnig er beðið um greiðsluupplýsingar. Hægt er að borga með kreditkorti, millifærslu úr heimabanka eða gjafakorti. Ef greitt er með kredit- eða gjafakorti er gott að hafa það við höndina.
 
6.      Það getur komið upp rauður kassi og upphrópunarmerki í kringum netföng hjá fólki með ákveðin stýrikerfi og stillingar. Haldið ótrauð áfram því þið komist á næstu stig þótt kassinn rauði komi upp. Ef þú lendir í vandræðum með skráningarkerfið, t.d. ef það segir að kennitalan sé þegar skráð skaltu prófa að loka vafranum alveg eða hreinsa minnið í vafranum (e. empty cache) og reyna aftur. 
 
7.      Ekki er víst að vinir eða systkini geti verið saman í tímum. Algengt er að vinir vilji vera saman í tímum, en þar sem mörg fög eru fljót að fyllast er ekki víst að það sé hægt.
 
8.  Það er ekki hægt að breyta námskeiðum í stundatöflum eftirá nema vegna mjög sérstakra aðstæðna.
 
Við óskum ykkur góðs gengis við skráninguna og hlökkum til að sjá ykkur!