Háskóli Íslands

Við þökkum samveruna í Háskóla unga fólksins 2016

Vel heppnaðri viku í Háskóla unga fólksins lauk á fimmtudag með veglegri lokahátíð og vísindagleði í Háskólabíói þar sem nemendur tóku við viðurkenningarskjölum fyrir þátttökuna í skólanum þetta árið.
 
Óhætt er að segja gleðin hafi skinið úr andlitum þátttakenda í Háskóla unga fólksins að lokinni fjögurra daga fjölbreyttri dagskrá en frá mánudegi til fimmtudags sóttu nemendur námskeið sem þeir höfðu valið og tengjast greinum af öllum fræðasviðum Háskóla Íslands. Valið stóð alls á milli 50 námskeiða og þemadaga sem er met fjöldi í sögu skólans. 
 
Áhuginn á hinum fjölbreyttu greinum vísindanna leyndi sér ekki og það var virkilega líflegt og skemmtilegt á háskólasvæðinu á meðan skólinn stóð yfir. 
 
Miðvikudag sóttu nemendur þemadaga og voru þau mörg hver út um hvippinn og hvappinn í vettvangsferðum og komu alæl og margs fróðari til baka. Að loknum örnámskeiðum á fimmtudag var skundað í Háskólabíó þar sem við tók lokahátíð Háskóla unga fólksins en þar fengu nemendur afhent viðurkenningarskjal fyrir þátttöku í skólanum. Enn fremur söng Alda Dís við mikinn fögnuð upp á stóra sviðinu og að lokinni athöfninni biðu nemenda, systkina þeirra og forráðamanna veitingar og lifandi vísindamiðlun í anddyri Háskólabíós. 
 
Það er samdóma álit þeirra sem komu að skipulagningu og vinnu við Háskóla unga fólksins að nemendur í ár hafi verið til stakrar fyrirmyndar og sýnt bæði áhuga, frumkvæði og mikla hugmyndaauðgi í þeim námskeiðum sem þeir sóttu.
Þannig var tíminn ekki aðeins lærdómsríkur fyrir nemendur heldur einnig kennara skólans. 
 
Aðstandendur Háskóla unga fólksins þakka innilega fyrir frábærar viðtökur þetta árið og hlakka til að sjá spræka og forvitna nemendur aftur að ári.
 
Hér að ofan eru nokkrar myndir frá starfi skólans en nálgast má mun fleiri myndir á Facebook-síðu Háskóla unga fólksins.