Á þriðja hundrað fróðleiksfúsir og fjörugir 12-14. ára nemendur streymdu í Háskóla Íslands í morgun til að setjast á skólabekk í Háskóla unga fólksins.
Háskóli unga fólksins fagnar 20 ára afmæli í sumar og var því settur í tuttugasta sinn í morgun. Við skólasetningu fengu nemendur afhent námsgögn og hlýddu á þau Jón Atla Benediktsson, rektor Háskóla Íslands, og Kristínu Ásu Einarsdóttur, skólastjóra Háskóla unga fólksins.
Að lokinni skólasetningu á Háskólatorgi héldu áhugasömu ungu nemendurnir svo í sína fyrstu kennslustund í Odda og Öskju í fylgd starfsmanna skólans.
Í fyrstu kennslustund fengust nemendur m.a. við stjörnufræði, ævintýri orðanna, réttarvísindi, sjúkraþjálfun, skurðlækningar, japönsk fræði, efnafræði, dulkóðun, heimspeki og manneskjuna, lögfræði, íþrótta- og heilsufræði, gervigreind, hvali í sýndarveruleika og blaða- og fréttamennsku.
Næstu fimm dagar verða þéttskipaðir af fróðleik og fjöri með fræðimönnum Háskóla Íslands, en nemendur sækja námskeið af öllum sviðum Háskóla Íslands, í félagsvísindum, hugvísindum, menntavísindum, heilbrigðisvísindum, verkfræði, raun- og náttúruvísindum og þverfræðilegum greinum.
Megináhersla skólans er að vekja áhuga ungs fólks á námi, vísindum og fræðum og gefa unga fólkinu kost á því að fræðast um flestallt milli himins og jarðar.
Kristinn Ingvarsson, ljósmyndari Háskólans, var á ferðinni um háskólasvæðið í dag og myndaði glaðbeitta nemendur þennan fyrsta dag.
Á morgun, þriðjudag, mæta nemendur beint í kennslustofu samkvæmt stundatöflu. Við þökkum kærlega fyrir daginn og sjáumst aftur hress í fyrramálið.
Myndir af starfi skólans vikuna 10 - 14. júní 2024
![](/sites/ung.hi.is/files/styles/photo_small/public/2024-06/kri_huf_mbl_240610_001.jpg?h=2ad0a8ba&itok=u3qzXC2R 479w, /sites/ung.hi.is/files/styles/photo_medium/public/2024-06/kri_huf_mbl_240610_001.jpg?h=2ad0a8ba&itok=TEUYxXBa 480w, /sites/ung.hi.is/files/styles/photo_large/public/2024-06/kri_huf_mbl_240610_001.jpg?h=2ad0a8ba&itok=wDGnFmMt 768w, /sites/ung.hi.is/files/styles/photo_extra_large/public/2024-06/kri_huf_mbl_240610_001.jpg?h=2ad0a8ba&itok=sdbv-pjc 1024w, /sites/ung.hi.is/files/styles/photo_full/public/2024-06/kri_huf_mbl_240610_001.jpg?h=2ad0a8ba&itok=x3rTAuWX 1440w)