Veðurguðirnir léku sannarlega við nemendur og starfsfólk á öðrum degi Háskóla unga fólksins!
Það var líf og fjör strax í morgunsárið þegar ungu og fróðleiksfúsu nemendurnir okkar mættu spenntir til leiks. Við tóku fjölbreytt og spennandi námskeið þar sem meðal annars var kafað ofan í kínversk fræði, lögfræði, stjörnufræði, lyfjafræði, fornleifafræði og félagsráðgjöf, auk þess sem nemendur fengu fræðslu í tölvutækni, forritun og íþrótta- og heilsufræði.
Áhuginn leyndi sér ekki og margir kennarar nýttu blíðviðrið til að færa kennsluna út undir bert loft, sem gaf deginum enn skemmtilegri blæ.
Í frímínútum nýttu nemendur og starfsfólk góða veðrið útivið í skotbolta, pókó, eitur í flösku og fleiri hressilegum leikjum.
Á morgun, föstudag, heldur vísindaævintýrið áfram með enn meiri fróðleik. Að því loknu verður slegið upp glæsilegri lokahátíð, en henni fylgir grillveisla í hádeginu, uppblásin leiktæki, skemmtun og sannkallað sumarstuð!
